دانشجویان تورک دانشگاه شهید بهشتی

 http://www.boxca.com/jroidpfuna6p/bilim_son.pdf.html

http://www.boxca.com/5ibnp3mjfiwt/bilim.pdf.html

خوش خبر

بوگون درگینین مجویزین دانشگاهدان آلدیغ

نشریه نین آدی بیلیم دی

بیر کیتای سرگیسی دانشکده علوم دا اردیبهشت آیین 5 و 6 و 7 (ساعات ۹ تا ۱۸)سینده قورولاجاغ

بو سرگیده تورکی کیتابلار و سی دی لر و پوسترلر ساتماغا قویولاجاغ.

دئمئلیک کی بو نمایشگاه اندیشه نو یایین اوی همکارلیق لارینان اولاجاغدی .

يار آغلادى

اوستاد هوشنگ جعفرى


( اوستاد بو گوزل شعرينى اؤز ياشاييش يولداشينا دئييب دير )

***

يارين بويون قوجاقلاديم ، يار آغلادى من آغلاديم
ييغيشدى قونشولار بوتون ، جار آغلادى من آغلاديم


باشيندا قار قالان داغا ، دانيشديم آيريليق سؤزون
بير آه چئكيب باشينداكى ، قار آغلادى من آغلاديم


طاريمدا نار آغاجلارى منی گؤروب دانيشديلار
بويومو زيتون اوخشادى ، نار آغلادى من آغلاديم


ائله كی اسدی بير خزان ، تالاندى گوللريم منيم
خبر چاتينجا بولبوله ، خار آغلادی من آغلاديم


اوره ك سؤزون دئديم تارا ، سيملر اولدو پارا پارا
ياواش ياواش سيزيللادى ، تار آغلادى من آغلاديم


دئديم كی حق منيمكیدى باشيمی چئكديلر دارا
طناب كسنده بوينومو ، دار آغلادى من آغلاديم


« جعفرى » يم ؛ بويوم بالا ، غم سينه مده قالا قالا
يار جانيمی آلا آلا ، يار آغلادی من آغلاديم

خالق شاعیری « بولود قاراچورلو، سهند» (۱۳۵۸-۱۳۰۵)

من نه وطنسیزم نه ده گؤبه لك

دوغما دییاریم وار بؤیوك ائلیم وار

منیمدیر هم كئچمیش هم ده گله جك

موعاصير آزربایجان ادبیياتینین گؤرکملی شاعیری بولود قاراچورلو سهند ۱۳۰۵ اینجی ایلده مراغه شهرینده بیر ایشچی عایيله سینده دوغولموشدور.

شاعیریمیز سهند اؤلکه میزده اوز وئرمیش بویوک تاریخی حادیثه لرین شاهیدی و میللی حرکاتین ایشتيراکچیسی اولموشدور.

بولود قاراچورلو سهند ريضاخان ايستيبدادینین ان قورخونج ایللرینده دوغولوب, بویا باشا چاتدی. او درس اوخوماق اوچون گئتدیيی مدرسه ده اؤز آنا دیللینده اوخویوب – یازماق و حتتا دانیشماغا حاقلی اولماسا بئله, یارادیجیلیغا باشلادیغی گوندن شئعر و منظومه سینین اساس حیصصه سینی آنا دیلینده یازماغا باشلادی و عومرونون سونونا قده ر ده بو دؤزولمه ز شرایيطه باخمایاراق اؤز وارلیغی, دیلی, تاریخی, مدنیيتی یولوندا یورولمادان و یئنیلمه دن جار چکیب قلم چالدی. آزربایجان ميللی حوکومت چاغلاری سهند یاخشی نفس چکیردی بو دوورده او بعضی ادبی ییغینجاقلاردا ایشتیراک ائتمکله ادبیياتلا داها آرتیق تانیش اولموش و شاعیرلر مجلیسینده دویغولو شئعرلر اوخویاردی, شاعيرین ایلک شئعر نومونه لری ۱۹۴۵-ده تبریزده بيراخیلان شاعیرلر مجلیسی انتولوژیسینده بيراخیلدی.

او ایللرده, گونئی آزربایجاندا قورولان ميللی دئموکراتیک ایسته کلرینی عمله گئچیرمه يه مووففق اولدو, بیر ایلدن اوزون سورمه ین بو حوکومت. پهلوی ایستیبدادینین قوربانی اولدو, لاکین قانا بویانمیش آزربایجاندا کؤزه ره ن اوجاق سؤنمه دی, شاعیر چوخلو آزربایجان یازیچیلاری کیمی شاه ایستیبداد رئژیمینین طرفیندن حبسه آلینیب, سونرا سورگون ائدیلدی. شاعیریمیز چوخلو شيکنجه لره معروض قالدی آمما آنا دیلینه, آنا یوردونا و دوغما ائللرینه وفالی قالاراق, ائللر ایچینده محببت , سئوگی, ایگیدلیک و اينسانيیتدن نغمه لر قوشوب دستانلار یاراتدی. سهند ۱۹۵۱ ایللرینده دوستاقدا ایکی بویوک منظومه, بیریسي « آراز» و او بیریسی « خاطیره»نی یازدی. بو منظومه لرده بویوک بیر خالقین باشینا گله ن تاریخی فاجیعه لردن سوز آچیر.

سهند تئهراندا سورگون اولار کن ادبی ییغینجاقلاردا گئنیش شکیلده ایشتیراک ائتمکله بیر چوخ شاعیر و یازیچیلاریلان داها آرتیق یاخیندان تانیش اولور. سهندین تانیش اولدوغو کیمسه لردن کی قاباقجا دا اونلا آز – چوخ تانیش ایدی اوستاد محمد علی فرزانه ایدی, سهندین اوستاد فرزانه ایله تانیش اولماسی سهندین یاشاییشیندا بیر دؤنوک نوقطه حئسابا گله بیله ر, نییه کی اوستادین تاپشیریقلاری و گوسته ریشلری نتیجه سینده سهند « سازیمیمن سوزو» کیمی شاه اثری یاراتدی. بو بیرینجی درجه لی شاعیر هله ایراندا تورکلرین آنا کیتابی ساییلان « دده قورقود» چاپ اولمامیشدان اونجه، اونون بیر سیرا بویلارین نظمه چکمیش و دئمک منظوم «دده قورقود» یارادا بیلمیشدی.

سهندین بو شاه اثرله ماراقلانماسی و تانیشلیغی بو مساله نی ثوبوتا یئتیریر کی شاعیر کولتورونه و مدنیيتینه آرتیق اوستونلوک وئریردی و بونا اساس دا شاعیرین اثری خالق طرفیندن ماراقلانیب و نئچه دفعه لرله چاپ اولوندو.

سهند بیر آزادلیق سئوه ن شاعیر ایدی کی اینسانچیلیق, قارداشلیق و میللتچیلیک شئعرلرینده اوز یئرین توتابیلمیشدی. او شئعرینین بیرینده بئله دئییر : اه یه ر من تورکلردن ديفاع ائدیره مسه بو او دئمک دئییل کی اونلاری اوستون بیر عيرق (نژاد) بیلیره م بلکه اونلارین اینسانی حوقوقلارینی طلب ائدیره م.

سهند ۱۳۴۶ اینجی ایلده شاعیر شهریارا مکتوبلار یازدی. بو مکتوبدا شاعیر ائلین دردلرینی سویله مکدن سونرا شهریاردان ایسته ییر بو یارالارا مرهم قویسون. سهند مکتوبونون بیر چوخ یئرینده اوستاد شهریارا چوخ ناراحات حالدا یاناشیر. سهندین فیکرینجه «هر بیر هنر صاحیبی ائلینه گووه نیب ائلینه آرخالانماسا, ائلین گؤزوندن دوشوب کنارا قویولاجاقدیر».

او مکتوب شهریاردا بیر شؤعله نین آلوولانماسینا سبب اولور و شهریارین شاه اثرلریندن اولان « سهندیيه» شاعیر سهند خطاب یارانیر.

شاه رئژیمی بوتون وار گوجو ایله سهندین قوللارین زنجیرله ییب اسیر ائتمکله, دوستاقلارا, سورگونلره محکوم ائتمکله, حقیقت سویله یه ن دیلینین باغلاماغین باجارابیلمه دی.

شاعیر سازیمین سؤزو اثرینده بیر موتفکكير کیمی حیاتین درینلیکلرینه جوماراق خالقی اؤزونو تانیماغا, سؤندورولموش ميللی شوعورو اویاتماغا و قارانلیقلاردا مشعل آختارانلارا آزادلیق و موباريزه یوللارینی گنجلره نيشان وئرمه يه چالیشیر.

آزربایجان و فارس شئعرینین هر ساحه سینده شئعر یازان و حتتا شاه اثرلر یارادان شاعيرلر چوخ اولموشدور. آنجاق خالقا میللی شوعورو آشیلایان, گئچمیشینی و گله جه يینی بو قده ر گوزه ل آنلادان شاعیر  آز اولموشدور. اوزه للیکله گونئی آزربایجاندا پهلویلر دوورونده حاکيم اولان بوغونتولو هاوادا فارس شووئنیزمینین موطلق حاکیمیيتی دٶورونده. سهند بیر شاعیر اولاراق, وطنینی آزاد, خالقینی خوشبخت گورمک ایسته ییردی.

یازینی سهندین یاخین دوستو و امکداشی بیزیم گورکملی یازیچیمیز رحمتلیک گنجعلی صباحینین سهندین وفاتی موناسیبتیله یازدیغی بیر پاراگرافلا بیتیرمک ایسته ردیک:

« افسوس کی آمانسیز اولوم اونو آزادلیغین ایلک باهاریندا سهند, ساوالان, حئیدربابا داغلارینین اتکلری لاله یاسمنله دولدوغو, کهلیکلری قاققیلداديغی, بولبوللری چهچه باشلادیغی زامان, او بویوک اینسانی, شئعر و ادب شاهینی بیزدن آییردی, آنجاق او اولمه ییب, او آلوولاندیردیغی شئعر و هونر مشعله سیله اوزونه بیر ابديیت یارادیب».

بئله لیکله سهند (۲۲ فروردین ۱۳۵۸ ه.ش) اؤز میللی آرزولارینان بیرگه بیزلردن آییریلدی آمما او اؤلمز اثرلری ایله اؤلمزلیکده یاشایان بیر کؤوره ک اوره کلی شاعیردیر.

                                      دلی جئیرانلی سهندیم...      

استاد هوشنگ جعفری دن بیر گوزل شعر

بير ائلي بوراندا قاردا چکه جم

بيرائلي باهاردا واردا چکه جم

بير شکيل چکه جم گوزگيله سينه

آرزيلار دوزوله سيل سيله سينه

بير باهار سالاجام قيش چيله سينه

بير لالا خونچاسين قاردا چکه جم

بير داغي چکه جم دومان ايچينده

بير ياخشي بيتره م يامان ايچينده

بير حققي دوغرولدام گومان ايچينده

شاختادا بير آغاج باردا چکه جم

بير سئلي چکه جم سارا قوينوندا

بير ائلي يارديم سيز يارا قوينوندا

بير ديلي ديلچک سيز داردا چکه جم

تيکيلي بير آغيز چکه جم بوما

بیر درین باخیش کی فیکیره جوما

یوللایام شکیلین تهرانا قوما

بیر ائلین یوخلوقون واردا چکه جم

بیر ایشیق چکه جم اوزاقدان آتیب

بیر دنیز چکه جم دنیزه باتیب

بیر ائلی چکه جم مین ایلدی یاتیب

وارلیغین بیلمیره م هاردا چکه جم

نیله ییم دیل سیز بیر باش چکه نمیرم

ائلیمین گوزونده یاش چکه نمیرم

بو ائلین ماهنی سین تاردا چکه جم

ائلیمی باهاردا واردا چکه جم

" استاد جعفری "

سلام اولسون

اوجاغ(کانون) و درگی(نشریه) ایستک کاغذی (درخواست) بو گونلر امور فرهنگی دانیشگاها وریلدی

بو زمینه ده زحمت چکن یولداشلاریمیزدان تشککور ائلریک.

آنا دیلی بیر دیل دییر کی آدام اونو یادین نان چیخادا   اونا گوره گلین   اوز آنا دیلیمیزی بو گوزل دیلی اوز چالیشمالاریمیزینان ساخلیاخ. و بو ایش من  و سنین ایشیدی .........

 بو عکس یونسکو نون پوستردی" آنا دیلینین گونونه گوره "

بیزیم آلایا(آلای = گروه ) عضو اولون

فقط بیر کلیک ورون

حیدربابا آلایی